بودونیانین هم ائنی هم اوزونو
من گؤرموشم فلکین هر اوزونو
گل سؤیله ییم سنه سؤزون دوزونو
دارگونونده چکیل دارا آغلاما
باش اوجا اول،باش اوجا ائت ائلینی
واردؤلته چوخ باغلاما بئلینی
وطن ناموس بیرده آنا دیلینی
قورو،ساخلا باشقا وارا آغلاما
بودونیا کی یوخدور اوندا اعتیبار
کوپ لرینده الوان الوان رنگی وار
بیری آغدیر بیری توتقون بیری تار
سنین کی ده اولسا قارا آغلاما
من دئمیرم طالیع یازی یازارمیش
اینسان اوغلو چوخ یازیلار پوزارمیش
کریم،دونیا بیر گؤرمه لی بازارمیش
یولون دوشسه بو بازارا آغلاما
کریم گول اندام - {سؤزوم وار سنه دونیا}کیتابیندان